मुंबई : पश्चिम रेल्वेच्या मुंबई मध्य विभागाने एक विचारपूर्वक आणि नैतिक मूल्यांवर आधारित उपक्रम सुरू केला आहे - नमस्ते अभियान, ज्याचा पूर्ण अर्थ आहे "नम्रता आणि स्ट्राँग तिकीट एक्झामिनेशन". हा उपक्रम म्हणजे एक तत्वज्ञान आहे, जे शिस्त आणि नियमांचे पालन करताना नम्रता, सहानुभूती आणि सन्मान यांचा समन्वय साधतो. या उपक्रमामागे सन्मान, सुरक्षा, सार्वजनिक हित, सहवेदना आणि जबाबदारी यांसारख्या मूल्यांची बांधिलकी आहे. या मोहिमेचा उद्देश तिकीट तपासणी करणाऱ्या कर्मचाऱ्यांमध्ये आत्मविश्वास निर्माण करणे, त्यांच्या हक्कांचे संरक्षण करणे आणि प्रवाशांचा एकंदर अनुभव अधिक चांगला करणे हा आहे. या उपक्रमाअंतर्गत 6 ऑगस्ट 2025 रोजी बोरिवली स्थानकात एक भव्य फोर्ट्रेस तिकीट तपासणी मोहीम

राबवण्यात आली. या तपासात 300 पेक्षा अधिक तिकीट तपासणी कर्मचारी, रेल्वे सुरक्षा बल आणि सरकारी रेल्वे पोलीस यांच्या सहकार्याने सुमारे 5,200 बिनतिकीट प्रवासी आढळले आणि एकूण 13.50 लाख रुपये दंड स्वरूपात वसूल करण्यात आले.

सुरक्षा आणि पारदर्शकता सुनिश्चित करण्यासाठी, तिकीट तपासणी कर्मचाऱ्यांना खास संरक्षक जॅकेट देण्यात आले आहेत. या जॅकेटमध्ये बॉडी कॅमेरे, हँड हेल्ड टर्मिनल (HHT), एक्सेस फेअर तिकीट (EFT) बुक आणि सार्वजनिक घोषणेसाठी मिनी स्पीकर ठेवण्याची व्यवस्था आहे. या तंत्रज्ञानाच्या मदतीने तिकीट तपासणाऱ्यांचे शारीरिक तसेच कायदेशीर संरक्षण होते आणि प्रवाशांशी होणाऱ्या संवादात पारदर्शकता व उत्तरदायित्व टिकवले जाते.

या अभियानाचा आणखी एक महत्त्वाचा भाग म्हणजे "प्री-कस्टडी क्षेत्रांची" उभारणी. ही ठिकाणं स्थानक परिसरात सीसीटीव्ही निगराणीत राहतील आणि बिनतिकीट प्रवाशांशी शांततेत आणि सन्मानपूर्वक व्यवहार करण्यासाठी वापरली जातील. अशा व्यवस्थेने अनावश्यक वादविवाद आणि कार्यालयीन गुंतागुंत टाळली जाते, ज्यामुळे प्रवासी आणि कर्मचारी दोघांनाही न्याय मिळतो. याशिवाय, वाणिज्य विभागाच्या अधिकाऱ्यांनी तिकीट तपासणी कर्मचाऱ्यांसाठी संवाद कौशल्य आणि व्यावसायिक वर्तन यावर आधारित कार्यशाळा घेतल्या आहेत.

नमस्ते अभियान हे सिद्ध करते की शिस्त आणि सहवेदना यांचा समतोल राखत उत्तम प्रशासन कसे करता येते. हा एक असा आदर्श उपक्रम आहे, जो नैतिकतेच्या अधिष्ठानावर आधारलेला आहे. तो केवळ प्रतिक्रिया देणारा नसून, संरचित, सुसंगत आणि पुढाकार घेणारा दृष्टिकोन स्वीकारतो जो न्याय, विश्वास, सार्वजनिक मालमत्तेचे संरक्षण आणि अग्रिम कर्मचारीवर्गाचा आत्मसन्मान जपतो.

नमस्ते हे फक्त अभिवादन नाही - ती एक विचारसरणी

आहे, एक प्रतिज्ञा आहे..."आम्ही शिस्तीचा आदर राखू, सन्मानाने वागू.

आम्ही विनम्र राहू, पण आमच्या कर्तव्यात कटाक्षाने ठाम राहू.

"या अभियानाच्या माध्यमातून पश्चिम रेल्वेने सुरक्षित, सन्मानपूर्वक आणि जबाबदारीने भरलेला रेल्वे अनुभव सर्व प्रवाशांसाठी साकारण्याची वचनबद्धता पुन्हा एकदा अधोरेखित केली आहे.