विविध नागरी समस्यांसाठी आज मनसेने काढला वाशी वॉर्ड ऑफिसवर "टाळ वाजवा मोर्चा" 

*वाशी बस डेपो लवकर सुरू करा अन्यथा मनसे डेपोचे उद्घाटन करून ते लोकांसाठी खुले करेल, गजानन काळे यांचा प्रशासनाला इशारा *

वाशी प्रभागात असलेला वाशी बस डेपोचे उद्घाटन करून लवकरात लवकर लोकांसाठी खुला करावा अशी मागणी करीत मनसे प्रवक्ते तथा नवी मुंबई शहर अध्यक्ष गजानन काळे यांनी वाशी वॉर्ड ऑफिस वर मोर्चा काढला. तसेच अनेकवेळा विविध नागरी समस्यांसंदर्भात निवेदने देऊनही प्रशासन तोडगा काढत नसल्याने मनसेने टाळ वाजवून वाशी विभाग कार्यालयावर मोर्चा काढला. खराब रस्ते-पदपथ, अतिक्रमणाचा विळखा, उद्यानाची दूरवस्था, रस्त्यावर पडलेला घनकचरा अशा विविध नागरी समस्यांनी वाशी मध्ये थैमान घातले आहे. या समस्यांचा जाब विचारण्या साठी आज मनसे तर्फे "टाळ वाजवा मोर्चा" चे आयोजन केले. मनसे प्रवक्ते, शहर अध्यक्ष श्री. गजानन काळे यांनी स्वतः या मोर्चाचे नेतृत्व केले. मोठया प्रमाणात महिला, स्थानिक नागरिक मोर्चा मध्ये उपस्थित होते. वाशी विभाग अधिकारी श्री. येडवे व इतर सर्व संबंधित अधिकारी मनसेच्या प्रश्नांची उत्तरे देण्यासाठी उपस्थित होते. 

वाशी बस डेपो तयार असून उद्घाटन करून लोकार्पण करण्यास अधिकारी टाळाटाळ करीत असल्याचे गजानन काळे यांनी विभाग अधिकारी यांच्या निदर्शनास आणून दिले. बस डेपो नसल्याने नागरिकांना राज्य महामार्गावर उन्हातान्हात उभे राहून बसची प्रतीक्षा करावी लागत आहे याची योग्य दखल घेऊन प्रशासनाने लवकर उद्घाटन करावे अन्यथा मनसे डेपोचे उद्घाटन करेल असेही यावेळी काळे यांनी अधिकाऱ्यांना बजावले.

वाशी विभाग अंतर्गत बांधण्यात आलेले शौचालयांची अत्यंत दुरावस्था झाली असून शौचालय सांभाळण्यासाठी दिलेल्या कर्मचाऱ्यांची मुले त्या शौचालयात बसून असतात अशी तक्रारही आनंद चौगुले व महिला सेना सचिव यशोदा खेडूसकर यांनी यावेळी केली. त्याच प्रमाणे अतिक्रमण व उद्यान, मैदान यांची स्वछता या संदर्भात अनेक प्रश्न उपस्थित करत यावर तात्काळ कार्यवाही करण्याची मागणी केली.

हे सर्व विषय सोडवण्याचा कालबद्ध कार्यक्रम पालिकेने मनसेला द्यावा व तात्काळ कार्यवाही करायला सुरुवात करावी. अन्यथा मनसे याहून तीव्र आंदोलन करेल असा इशारा गजानन काळे यांनी दिला. या मोर्चात मनसे शहर अध्यक्ष गजानन काळे, शहर सचिव विलास घोणे, महिला सेनेच्या शहर अध्यक्ष डॉ. आरती धुमाळ, उपशहर अध्यक्ष दीपाली ढउल, सचिव यशोदा खेडूसकर, विद्यार्थी सेना शहर अध्यक्ष संदेश डोंगरे, मनसे  विभाग अध्यक्ष सागर विचारे, अभिलेश दंडवते, श्याम ढमाले, विकास पाटील, अक्षय भोसले, विभाग सचिव संदेश खांबे, संजय शिर्के रोजगार विभाग शहरअध्यक्ष सनप्रीत तुर्मेकर, आनंद चौगुले आदी मोठ्या संख्येने महिला, स्थानिक नागरिक, महाराष्ट्र सैनिक उपस्थित होते.