नवी मुंबई महानगरपालिका कार्यक्षेत्रामध्ये विविध ठिकाणी सुरू असलेल्या कामांमध्ये होणाऱ्या ध्वनी व वायू प्रदुषणाच्या अनुषंगाने मा.उच्च न्यायालय, मुंबई यांनी स्वत:हून दाखल करुन घेतलेल्या Suo-moto (PIL No. 3/2023) मध्ये दि.11 डिसेंबर 2023 रोजी पारित केलेल्या आदेशानुसार वायू व ध्वनी प्रदूषण कमी करण्याबाबत आदेशित केलेले आहे. 

            त्यानुसार मा. उच्च न्यायालयाकडील दि. 11 डिसेंबर 2023 रोजीचे आदेश तसेच वायू व ध्वनी प्रदूषण आणि ब्लास्टींगच्या अनुषंगाने नागरिकांकडून नवी मुंबई महानगरपालिकेस प्राप्त होत असलेल्या तक्रारी विचारात घेता त्यावर कायम स्वरुपी तोडगा काढण्यासाठी उपाययोजना करण्याच्या अनुषंगाने महापालिका आयुक्त डॉ.कैलास शिंदे यांच्या मार्गदर्शनाखाली व मान्यतेने ‘मानक कार्यप्रणाली (Standard Operating Procedure - SOP)’ तयार करुन दि. 1 ऑगस्ट 2024 रोजी प्रसिध्द करण्यात आली होती. त्या मानक कार्यप्रणालीची मुंबई महानगर प्रदेश विकास प्राधिकरण (MMRDA) क्षेत्रात अंतर्भूत नवी मुंबई महानगरपालिका कार्यक्षेत्रामध्ये प्रभावी अंमलबजावणी करण्यात आली आहे.

            परंतू नवी मुंबई महानगरपालिका क्षेत्रामध्ये काही बांधकामाच्या ठिकाणी सुरू असलेल्या कामांमध्ये होणाऱ्या ध्वनी व वायू प्रदूषणाबाबतच्या मानक प्रणालीची पूर्तता होत नसल्याबाबत नागरिकांच्या तक्रारी प्राप्त झाल्या आहेत. त्या अनुषंगाने दि. 12 ऑक्टोबर 2025 रोजी या सुरू असलेल्या बांधकामाच्या ठिकाणी नवी मुंबई महानगरपालिकेमार्फत प्रत्यक्ष जागेची पहाणी करुन सदर मानक प्रणालीचे उल्लघंन होत असलेल्या एकूण 59 विकासकांना दि. 24 ऑक्टोबर 2025 रोजी सदर मानक प्रणालीची पूर्तता करण्याबाबत नोटीस बजाविण्यात आलेल्या आहेत.

             या अनुषंगाने नमुंमपा आयुक्त यांनी सहाय्यक आयुक्त यांना उपरोक्त मानक कार्यप्रणालीची कठोरपणे अंमलबजावणी करण्याकरिता दिलेल्या निर्देशानुसार विभाग स्तरावर विभागप्रमुख, उपअभियंता, सहा.अभियंता / कनिष्ठ अभियंता (स्थापत्य), स्वच्छता अधिकारी, स्वच्छता निरीक्षक / सहा. स्वच्छता निरीक्षक, उद्यान अधिक्षक / उद्यान सहायक अशा अधिकारी / कर्मचारी यांची दक्षता पथकामध्ये नेमणूक करण्यात आलेली आहे.

याबाबत महापालिका आयुक्त डॉ.कैलास शिंदे यांनी दिलेल्या निर्देशानुसार नगररचना विभागामार्फत सहायक संचालक नगररचना श्री.सोमनाथ केकाण यांच्या अध्यक्षतेखाली नवी मुंबई महानगरपालिका क्षेत्रामध्ये सुरू असलेल्या बांधकामाच्या ठिकाणी होणाऱ्या वायू व ध्वनी प्रदूषणाच्या अनुषंगाने सर्व विभागांचे सहाय्यक आयुक्त तथा विभाग अधिकारी तसेच विकासक व वास्तुविशारद यांची बैठक आयोजित करण्यात आली होती.

या बैठकीमध्ये सहायक संचालक नगररचना यांनी सुरू असलेल्या बांधकामाच्या ठिकाणी संरक्षक कुंपण बांधणे, बांधकाम साहित्य व राडा-रोडा साहित्य ने - आण करणाऱ्या वाहनांच्या चाकांची स्वच्छता करणे, पदपथ मोकळे व स्वच्छ ठेवणे, ठरवून दिलेल्या विहित वेळेत काम पूर्ण करणे, फॉगर्स लावणे, स्प्रिंकलर बसविणे, सीसीटिव्ही कॅमेरे बसविणे इ. बाबींची पूर्तता करणेबाबत सर्व विकासक, वास्तुविशारद व त्यांच्या प्रतिनिधींना ‍माहिती देण्यात आली.

नवी मुंबई महानगरपालिकेच्या मानक कार्यप्रणालीची सविस्तर माहिती देत त्याचे पालन सर्व विकासकांनी करावे अशा सूचना या बैठकीत देण्यात आलेल्या आहेत. ज्या विकासकांकडून सदर ‘मानक कार्यप्रणालीचे (Standard Operating Procedure - SOP)’ उल्लंघन होईल अशा विकासकांना दंड आकारण्यात येईल तसेच, समाधान न झाल्यास पर्यायाने ‘मानक कार्यप्रणालीचे (Standard Operating Procedure - SOP)’ उल्लंघन करणाऱ्या विकासकांच्या कामांना स्थगिती आदेश देण्याची कठोर कार्यवाही करण्यात येईल असे सहायक संचालक नगररचना श्री. सोमनाथ केकाण यांनी सूचित केले आहे.