नवी दिल्ली: लाल किल्ला मेट्रो स्थानकाजवळ सोमवारी सायंकाळी उभी असलेल्या ह्युंदाई i20 कारमध्ये झालेल्या भीषण स्फोटात किमान नऊ जणांचा मृत्यू झाला असून, अनेक वाहने जळून खाक झाली आहेत. स्फोट इतका तीव्र होता की त्याचा आवाज दूरवर ऐकू गेला आणि परिसरात भीतीचे वातावरण निर्माण झाले. स्फोटानंतर लागलेल्या आगीने क्षणातच आसपास उभ्या असलेल्या इतर वाहनांनाही वेढले, ज्यामुळे मोठ्या प्रमाणात नुकसान झाले.

ही घटना लाल किल्ला मेट्रो स्थानकाच्या गेट क्रमांक 1 जवळ सायंकाळी सुमारे 6 वाजण्याच्या सुमारास घडली, अशी माहिती दिल्ली अग्निशमन विभागाने वृत्तसंस्था ANI ला दिली.

स्फोटानंतर तात्काळ अग्निशमन दलाच्या सात गाड्या घटनास्थळी दाखल झाल्या. आगीवर नियंत्रण मिळवण्यासाठी अनेक तास प्रयत्न सुरू होते. पोलिस आणि बचाव पथकांनी तत्काळ बचावकार्य सुरू करून जखमींना जवळच्या रुग्णालयात हलवले.

लोकनायक जयप्रकाश नारायण (LNJP) रुग्णालयाचे वैद्यकीय अधीक्षक यांनी सांगितले की, "आठ जणांचा मृत्यू रुग्णालयात पोहोचण्यापूर्वीच झाला, तर इतर काही जखमींवर उपचार सुरू आहेत." जखमींमध्ये काहींची प्रकृती चिंताजनक असल्याचेही समजते.

चांदनी चौक व्यापारी संघटनेने शेअर केलेल्या व्हिडिओंमध्ये स्फोटानंतरच्या भीषण दृश्यांचा अंदाज येतो. कार पूर्णपणे जळालेली दिसते आणि आसपासच्या वाहनांचेही नुकसान झाले आहे. परिसरातील नागरिक आणि व्यापारी या घटनेने हादरले असून, पोलिसांनी तात्काळ संपूर्ण परिसर बंद केला आहे.

दरम्यान, दिल्ली पोलिसांनी या ह्युंदाई i20 कारच्या मालकाला चौकशीसाठी ताब्यात घेतले आहे. स्फोटाचे नेमके कारण अजून स्पष्ट झाले नसले तरी प्राथमिक तपासात पेट्रोल, डिझेल किंवा इतर ज्वलनशील पदार्थांचा स्फोट झाल्याचा अंदाज व्यक्त केला जात आहे. बॉम्ब स्क्वॉड आणि फॉरेन्सिक टीम घटनास्थळी दाखल होऊन तपास सुरू केला आहे.

या घटनेमुळे संपूर्ण दिल्ली हादरली असून, पोलिसांनी लोकांना अफवा न पसरवण्याचे आणि शांतता राखण्याचे आवाहन केले आहे. लाल किल्ला परिसरातील वाहतूक काही काळासाठी बंद ठेवण्यात आली असून, सुरक्षा यंत्रणा उच्च सतर्कतेवर आहेत.