मुंबई,दि. १२ नोव्हें, (क्री. प्र.), मुंबई खो-खो संघटनेच्या मान्यतेने कै. दत्ताराम गायकवाड फाउंडेशन पुरस्कृत व ओम साई ईश्वर सेवा मंडळ लालबाग आयोजित पुरुष आणि महिला मुंबई जिल्हा अजिंक्यपद व निवड चाचणी खो खो स्पर्धा आयोजित करण्यात आलेली आहे. महिलांमध्ये सरस्वती कन्या वि ओम साईश्वर तर पुरुषांमध्ये श्री समर्थ विद्यार्थीची अंतिम फेरीत भिडणार  

महिलांच्या उपांत्य फेरीमध्ये  ओम साईश्वर सेवा मंडळाने शिवनेरी सेवा मंडळाचा ५-४ (मध्यंतर ५-१) असा एक डाव राखून दणदणीत पराभव करत अंतिम फेरीत धडक मारली. या सामन्यात ओम साईश्वर सेवा मंडळाच्या वैष्णवी परबने दोन्ही डावात ४.३० मि दमदार संरक्षण करून विजयावर शिक्कामोर्तब केले. तिला उत्तम साथ देत कादंबरी तेरवणकरने नाबाद ४.३० मि. व २.१० मि. संरक्षण करत २ गुण मिळवण्यात यश मिळवले व इशाली आंब्रेने २ मि. संरक्षण करत २ गुण वसूल केले व विजय सहज केला. तर पराभूत शिवनेरी सेवा मंडळाच्या आरुषी गुप्ताने ३.५० मि. संरक्षण केले, कार्तिकी कणसेने १.१० मि. संरक्षण करून २ गुण मिळवले तर मुस्कान शेखने १.५० मि. संरक्षण करत जोरदार लढत देण्याचा प्रयत्न केला.

महिलांच्या दुसऱ्या उपांत्य फेरीच्या सामन्यात सरस्वती कन्या संघाने अमरहिंद मंडळाचा  ४-३ असा तब्बल साडेसहा मि. राखून अंतिम फेरीत धडक मारली. या सामन्यात सरस्वती कन्या संघाच्या शेजल यादवने ४.३०, ४.५० मि. संरक्षण केले व आक्रमणात दोन गुण वसूल करत अष्टपैलू खेळाची झलक पेश केली. त्यांच्याच खुशबू सुताराने २, नाबाद ४.१० मि. संरक्षण केले व आक्रमणात एक गुण मिळवला तर जान्हवी लोंढेने नाबाद २.३० मि. संरक्षण करून अंतिम केरीचे दार आपल्या संघासाठी उघडले. तर पराभूत अमरहिंदच्या संजना कुडवने ४.२० मि. संरक्षण केले, देविशा म्हात्रेने १.५० मि. संरक्षण केले व आक्रमणात २ गुण वसूल केले तर रुद्रा नाटेकरने १.५० मि; तन्वी उपळकरने नाबाद १.३० मि व रिद्धी कबीरने १.२० मि. संरक्षण करून दिलेली लढत अपयशी ठरली.

पुरुषांच्या उपांत्य फेरीच्या पहिल्या सामन्यात दादरच्या श्री समर्थ व्यायाम मंदिरने माहीमच्या ओम समर्थ भारत व्यायाम मंदिरवर १५-१३ (मध्यंतर १५-०७) असा एका डाव २ गुणांनी धमाकेदार विजय साजरा केला. या सामन्यात श्री समर्थ व्यायाम मंदिरच्या प्रतीक होडावडेकरने १.३० मि. संरक्षण करून आक्रमणात ३ गडी बाद केले, यश बोरकरने २.१०, १.४० मि. संरक्षण करून आक्रमणात  २ गडी बाद केले, तर वरद भाटक, ओम भरणकर व हितेश आग्रे यांनी प्रत्येकी २-२ खेळाडू बाद करत विजयाला गवसणी घातली तर पराभूत ओम समर्थच्या  सनी तांबेने १.३० मि. मि. संरक्षण करून आक्रमणात ५ गडी बाद करत सामन्यात रंगत भरली तर प्रशिक मोरेने, सोहम विलणकरने प्रत्येकी २-२ खेळाडू बाद करत जोरदार लढत दिली.

पुरुष गटातील दुसरा उपांत्यफेरीच्या सामन्यात विद्यार्थी क्रीडा केंद्राने सरस्वती स्पोर्ट्स क्लबचा २.३० मि. राखून ११-१० (मध्यंतर ५-५) असा एका गुणाने शानदार विजय मिळवत अंतिम फेरीत स्थान पक्के केले. या सामन्यात विद्यार्थी क्रीडा केंद्राच्या जनार्दन सावंतने १.५०, २ मि. संरक्षण करून आक्रमणात  २ गडी बाद केले, प्रतीक घाणेकरने २.५० मि. संरक्षण करून आक्रमणात  २ गडी बाद केले, शुभम शिंदेने २ मि. संरक्षण करून आक्रमणात  २ गडी बाद केले व सम्यक जाधवने १.५० मि. संरक्षण करून आक्रमणात  २ गडी बाद केले व तर सरस्वती स्पोर्ट्स क्लबच्या करण गरोळेने १.३० मि. संरक्षण केले व ३ खेळाडू बाद केले त्याला धमाकेदार साथ देताना राहुल जावळेने ३ मि. संरक्षण केले व ३ खेळाडू बाद केले,  रोहन टेमकरने २.४० मि. संरक्षण करताना १ खेळाडू बाद केला तर श्रेयस राऊळने २  मि. संरक्षण करून १ खेळाडू बाद केला मात्र ते आपल्या संघाला पराभवापासून वाचवू शकले नाहीत.