मुंबई (गुरुदत्त वाकदेकर) : गुरुपौर्णिमेच्या निमित्ताने सालाबादप्रमाणे यंदाही विधीवत पूजाअर्चा गार्‍हाणं घालून मुंबईच्या सर्व गोविंदांनी सरावाचा आरंभ केला. कोणी कुठे कसं उभं रहायचं हे मास्तर सांगतात आणि सगळे गोविंदा इमानेइतबारे एेकतात. गोविंद्यांची शिस्त खरंच वाखाणण्याजोगी असते. एकची बळ काय असतं हे शिकण्याचा उत्सव म्हणजे दहीहंडी. 

हीच दहीहंडी अगदी काही दिवसांवर येऊन ठेपलेली आहे. सगळेच गोविंदा आपली अंतिम याेजना आखत आहेत. आपल्या कोणत्याच गोविदांना इजा होऊ नये म्हणून प्रत्येकजण काळजी घेत आहे. हीच झालेली तयारी आणि एकमेकांना कसं सहकार्य करतात हे तपासून घेण्यासाठी काही ठिकाणी सराव शिबिरात देखील ह्या गोविंदांनी हजेरी लावली.

आज अमृतमहोत्सवी स्वातंत्र्यदिनाचे औचित्य साधून काळाचौकी येथील ओम साई गोविंदा पथक, जिजामाता नगर यांनी आपला सराव आपल्या घरच्या मैदानातच तपासून बघायचं ठरवलं. मास्तर सांगत होते तसे गोविंदा सरसर चढत होते अन् बघताबघता काही क्षणांत मानवी मनोरा उभा करत होते. ही त्यांची तयारी बघून मास्तरांसोबतच विभागातील नागरिकही खूष झाले होते. ह्याच क्षणाचा लाभ घेऊन अगदी वरच्या थरावर जाणार्‍या गोविंदाने मास्तरांकडे एक परवानगी मागितली आणि मास्तरांनी थोडा विचार करून तसेच सावधगिरीच्या सूचना देऊन ती परवानगी दिली. मग काय तर पठ्ठया एकदम खूष झाला. सगळे थर व्यवस्थितपणे लागले. दोन एक्के लागले आणि ह्या गोविंदाने खिशातून भारतीय राष्ट्रध्वज काढला आणि दोन्ही हातात धरून उभा राहिला आणि ओम साई गोविंदा पथकाने अमृतमहोत्सवी स्वातंत्र्यदिना निमित्त अनोखी सलामी दिली. त्याचवेळी उपस्थितांनी "भारतमाता की जय", "वंदेमातरम" अशा घोषणा देऊन आसमंत दुमदुमवून टाकला आणि सर्व गोविंदांना शुभेच्छा दिल्या.