नवी मुंबई महानगरपालिकेच्या वतीने पुरविण्यात येणाऱ्या नागरी सेवासुविधांची कामे त्या ठिकाणची गरज लक्षात घेऊन करण्यात येत असून जनहित याचिकेवरील मा.न्यायालयाच्या आदेशानुसार रस्ते खड्डेमुक्त असावेत याकडे विशेष लक्ष देण्यात येत आहे. त्यानुसार आवश्यक रस्ते सुधारणा कामांना वेग देण्यात आला असून यामधील काही कामांची पाहणी आयुक्त्‍ डॉ.कैलास शिंदे यांनी शहर अभियंता श्री.शिरीष आरदवाड यांच्यासह अचानक भेट देत केलेली आहे. यामध्ये डांबरी रस्त्यांच्या कामामध्ये वापरल्या जाणाऱ्या साहित्याच्या परिमाणांची पडताळणी आयुक्तांनी केली असून मौलिक सूचना केल्या आहेत.

            याशिवाय नवी मुंबई विमानतळावरील प्रत्यक्ष उड्डाणांना काही दिवसातच प्रारंभ होणार असून त्या अनुषंगाने नवी मुंबई महानगरपालिका क्षेत्रातील  मुख्य रस्ते त्या दर्जाचे असण्यावर भर देत शासनाच्या निर्देशानुसार रस्ते सुधारणा कामे करण्यात येत आहेत.  महापालिका क्षेत्रातील रस्ते अधिक काळपर्यंत चांगले राहावेत यादृष्टीने रस्ते काँक्रीटीकरणावर भर देण्यात येत असून मुख्य चौकांचेही काँक्रीटीकरण करण्यात येत आहे. काँक्रीट रस्त्यांमुळे रस्त्यांची गुणवत्ता वाढणार असून नवी मुंबईच्या विकासाला चालना मिळणार आहे.

            अशाच प्रकारे सिडको कालीन जुन्या गटारांची पाणी वाहून नेण्याची क्षमता कमी झाल्याने नव्याने बांधणी करणे अथवा त्यामध्ये सुधारणा करणे गरजेचे आहे हे लक्षात घेत तसेच जलवाहिन्या व इतर सुविधांसाठी रस्ते खोदल्याने गटारे नादुरुस्त झाली असल्यास त्यांचीही दुरुस्ती व आवश्यकतेनुसार नव्याने बांधणी त्या त्या ठिकाणची गरज लक्षात घेऊन करण्यात येत आहे.

            याशिवाय महानगरपालिका क्षेत्रात सायन्स पार्क, सेंट्रल लायब्ररी, ऐरोली नाटयगृह, ऐरोली घणसोली सी-लिंक मार्ग, वेस्ट टू एनर्जी असे विविध महत्वाचे प्रकल्प उभारण्यात येत असून त्याव्दारे नागरिकांचे जीवन अधिक सुखकर होणार आहे.

            नवी मुंबई महानगरपालिका क्षेत्रातील हवेची गुणवत्ता चांगली राहावी याकरिता पर्यावरण विभागामार्फत अभ्यासपूर्वक ठोस उपाययोजना करण्यात येत असून हवेतील धुळीचे प्रमाण कमी करण्यासाठी अत्याधुनिक यंत्रसामुग्री व वाहनांचा प्रभावी उपयोग करण्यात येत आहे. मध्यंतरी विमानतळाच्या कामामुळे नवी मुंबईत धुळीचे प्रमाण वाढले होते, त्यावर महानगरपालिकेने विविध उपाययोजना राबविल्या होत्या. त्या उपाययोजना अधिक प्रभावी करुन ज्यामध्ये रस्त्यांच्या कडेची माती ब्रशव्दारे काढणे व संकलित करुन उचलणे, प्रक्रीयाकृत पाण्याव्दारे रस्ते धुणे, रस्ते स्वच्छतेसाठी यांत्रिकी वाहनांचा वापर करणे, फॉगिंग मशिन वापरणे अशा विविध उपाययोजना राबविल्या जात आहेत. शहरात ठिकठिकाणी हवा गुणवत्तेचे मापन होत असून त्या परीक्षणाचा उपयोग करुन आवश्यक त्या ठिकाणी  हवा गुणवत्ता सुधारणेसाठी उपाय केले जात आहेत.

            सुनियोजित बांधणीचे आधुनिक निवासयोग्य शहर असा नवी मुंबई शहराचा नावलौकिक असून तो वाढविण्यासाठी नवी मुंबई महानगरपालिका नागरी सेवासुविधा पूर्तता करताना आवश्यकता लक्षात घेऊन नागरिकांना अपेक्षित कार्यवाही करीत आहे.