मेट्रो कामाचे गर्डर बसविण्यास उशीर झाल्याने घोडबंदर मार्गावर वाहतुक कोंडी ठाणे: घोडबंदर मार्गावर रविवारी सकाळी ६ वाजेपर्यंत तुळई (गर्डर) बसविण्याची मुदत होती. परंतु हे काम सकाळी ८ वाजेच्या सुमारास पूर्ण झाले. या कालावधीत घोडबंदर मार्गावर वाहतुकीचा भार वाढल्याने घोडबंदर मार्गावरील भाईंदरपाडा, कासारवडवली, वाघबीळ, पातलीपाडा, ब्रम्हांड सिग्नल, ब्रम्हांड अंतर्गत मार्गावर मोठ्याप्रमाणात वाहतुक कोंडी झाली. त्यामुळे कामानिमित्ताने ठाणे रेल्वे स्थानकाच्या दिशेने वाहतुक करणाऱ्या प्रवाशांचे हाल झाले. तसेच ठाण्याहून घोडबंदरच्या दिशेने वाहतुक करणाऱ्या मार्गिकेवरही वाहतुक कोंडी झाली होती. त्यामुळे घोडबंदरच्या प्रवासातही प्रवाशांना वाहतुक कोंडीचा त्रास सहन करावा लागला. घोडबंदर येथील मानपाडा भागात मेट्रो मार्गिकेचे स्थानक उभारले जात आहे. या मेट्रो स्थानकापासून काही मीटर अंतरावर मुल्ला बाग परिसरात पादचारी पूल उभारला जात असून त्याचे काम मुंबई महानगर प्रदेश विकास प्राधिकरणाकडून (एमएमआरडीए) सुरु होते. रविवारी सकाळी ६ वाजेपर्यंत या कामास परवानगी होती. परंतु तुळई उभारण्यास सुमारे सकाळी ८ वाजले. या कालावधीत येथील मानपाडा भागात होणारी वाहतुक बंद करावी लागली होती. त्याचा परिणाम येथील वाहतुक व्यवस्थेवर झाला.घोडबंदरहून ठाण्याच्या दिशेने वाहतुक करणाऱ्या मार्गिकेवर भाईंदरपाडा ते ब्रम्हांड सिग्नल पर्यंत वाहतुक कोंडी झाली होती. वाहनांना ब्रम्हांड सिग्नल येथून अंतर्गत मार्गावर प्रवास करण्यास मुभा असल्याने येथील अंतर्गत मार्गावरही कोंडी झाली होती. तर ठाण्याहून घोडंबदरच्या दिशेने बाहतुक करणाऱ्या मार्गिकेवरही आर मॉलपर्यंत वाहतुक कोंडी झाली होती. या वाहतुक कोंडीमुळे घराबाहेर पडलेल्या नागरिकांचे हाल झाले. तुळई बसविल्यानंतर मानपाडा भागातील वाहतुक सोडण्यात आली. परंतु वाहतुक कोंडी पूर्णतः सुटली नव्हती.